Karlotta og Kolfinna á skotskónum og Pétur með fyrirliðabandið

U16 ára landslið Íslands í fótbolta taka þátt í UEFA Development mótum þessa dagana og eigum við þar fjóra fulltrúa.

Stelpurnar léku annan leik sinn í dag og unnu glæsilegan 4-0 sigur á Ísrael þar sem Karlotta Björk Andradóttir úr Þór/KA gerði annað mark Íslands. Stelpurnar unnu Tékkland 5-1 í fyrsta leik sínum í verkefninu þar sem Kolfinna Eik Elínardóttir úr Þór/KA gerði eitt af mörkum Íslands. Leikið er í Wales.

Strákarnir hófu leik í dag með leik gegn Armenum þar sem Þórsarinn Pétur Orri Arnarson bar fyrirliðaband íslenska liðsins. Hinn Þórsarinn í hópnum, Egill Orri Arnarsson lék síðasta hálftímann í leiknum sem lauk með 5-2 sigri Íslands í vítaspyrnukeppni eftir að staðan var jöfn, 1-1 að loknum venjulegum leiktíma. Leikið er á Möltu.

Bæði lið leika þrjá leiki í verkefnum sínum og munum við greina nánar frá ferðinni auk mynda þegar verkefnunum lýkur.