Fyrsta mark Nökkva og loksins útisigur

12.08.2023
Nökkvi Hjörvarsson mundar skotfótinn og skorar í lokasókn leiksins. Skjáskot úr upptöku á YouTube-rá…
Nökkvi Hjörvarsson mundar skotfótinn og skorar í lokasókn leiksins. Skjáskot úr upptöku á YouTube-rás Lengjudeildarinnar.
. . .

Þórsarar náðu loks í fyrsta sigur sinn á útivelli í sumar með marki úr síðustu sókn leiksins gegn Ægi í Þorlákshöfn. Nökkvi Hjörvarsson (2006) skoraði sitt fyrsta meistaraflokksmark og tryggði stigin þrjú.

Eftir að hafa náð tveggja marka forystu snemma leiks og misst hana niður í jafntefli í seinni hálfleik tókst Þórsurum að nýta lokasekúndur leiksins til að tryggja sér fyrsta útisigurinn í deildinni í sumar. Heppnin var með í spilum því upp úr misheppnaðri hreinsun heimamanna fengu Þórsrar boltann á vallarhelmingi Ægismanna, brunuðu fram og boltinn barst til Nökkva Hjörvarssonar utarlega í teignum vinstra megin. Nökkvi skaut að marki og skoraði, alveg út við stöng, en markmaður Ægismanna var þó í boltanum. Fyrsta mark Nökkva í deildinni, en hann er 17 ára og þetta var aðeins önnur innkoma hans með liðinu í sumar.

  • 0-1  -  Bjarni Guðjón Brynjólfsson (22'). Stoðsending: Kristófer Kristjánsson.
  • 0-2  -  Alexnder Már Þorláksson (25'). Stoðsending: Fannar Daði Malmquist Gíslason.
  • 1-2  -  Ivo Alexndre Perreira (68')(v).
  • 2-2  -  Sjálfsmark (73')
  • 2-3  -  Nökkvi Hjörvarsson (90+4'). Stoðsending: Mark Sörensen.

Sigurinn í Þorlákshöfn var sá fyrsti hjá liðinu á útivelli í sumar, en áður höfðu komið tvö jafntefli á útivöllum, í Grindavík og Njarðvík. Stigin þrjú voru mikilvæg því Þórsliðið var aðeins þremur stigum frá fallsæti fyrir þessa umferð, en er núna þremur stigum frá umspilssæti - gætu reyndar orðið sex stig aftur eftir að umferðinni lýkur, ef Vestri vinnur í Njarðvík. 

Eftir leiki gærdagsins er Þór í 7. sæti með 20 stig. Næsti leikur liðsins er heimaleikur gegn Þrótti miðvikudaginn 16. ágúst kl. 18.

Upptaka af leiknum er á YouTube-rás Lengjudeildarinnar, en hér að neðn er hægt að fara beint inn á upptökuna til að skoða hvert mark fyrir sig.

0-1

0-2

1-2

2-2

2-3

Til baka