Körfubolti: Bikarslagur í Höllinni í kvöld, sigurliðið fer í stóru Höllina

Þór mætir Stjörnunni í átta liða úrslitum VÍS-bikarkeppni kvenna í körfubolta í dag kl. 18. Leikurinn fer fram í Íþróttahöllinni á Akureyri. Sigurliðið fer í undanúrslit sem spiluð eru í Laugardalshöllinni um miðjan mars.

Það þarf varla að endurtaka fyrir körfuboltaáhugafólki að Þór og Stjarnan hafa mæst óvenju oft undanfarna mánuði, en liðin börðust um sigur í 1. deildinni í vor og fengu bæði sæti í Subway-deildinni. Stjarnan hefur unnið fleiri leiki í deildinni í vetur, en liðið situr nú í 3. sætinu, hefur unnið níu leiki af 14, en Þór er í 5. sætinu með sjö sigra í 14 leikjum. Það á þó auðvitað ekki að skipta máli í kvöld þegar liðin mætast í bikarleik og allt er undir, annað liðið áfram og hitt úr leik.

Í öðrum leikjum átta liða úrslitanna mætast Haukar og Keflavík, Valur og Grindavík og Njarðvík mætir Hamri/Þór, eina liðinu úr 1. deild náði í átta liða úrslitin.

Þór vann Aþenu í 16 liða úrslitunum, en Stjarnan vann Snæfell.

Ástæða er til að hvetja stuðningsfólk til að fjölmenna í Höllina og styðja stelpurnar því það eitt getur gert útslagið um það hvoru megin sigurinn lendir.

• Mót: VÍS-bikarinn, átta liða úrslit
• Leikur: Þór - Stjarnan
• Staður: Íþróttahöllin á Akureyri
• Dagur: Laugardagur 20. janúar
• Tími: 18:00
• Útsending: Þór TV