Eva Wium valin í A-landsliðið

Eva Wium Elíasdóttir í einum af leikjum Þórsliðsins í úrslitaeinvíginu við Stjörnuna um sigur í 1. deildinni síðastliðið vor. Mynd: Páll Jóhannesson.

Eva Wium Elíasdóttir hefur verið valin í A-landsliðshópinn í körfubolta fyrir æfingaleiki gegn Svíum á næstu dögum.

Eva var lykilleikmaður í liði Þórs sem tryggði sér sæti í Subway-deildinni á komandi tímabili í fyrst skipti í 47 ár, en eftir því sem næst verður komist er enn lengra síðan kvennalið Þórs átti fulltrúa í A-landsliðinu. Í fyrsta landsliðhópi Íslands sem keppti á Norðurlandamótinu í apríl 1973 voru tvær úr Þór, en þó raunar fjórar sem voru valdar í hópinn upphaflega. Þær Friðný Jóhannesdóttir og Þóra Þóroddsdóttir fóru á Norðurlandamótið. Anna Gréta Halldórsdóttir og Guðný Jónsdóttir voru valdar í hópinn, en fóru ekki með liðinu.

Eva hefur í sumar verið á fullu með U20 landsliði Íslands, bæði Norðurlandamóti og Evrópumóti. Það má því segja að megnið af sumrinu fari í körfubolta hjá Evu og verður spennandi að fylgjast með henni með A-landsliðinu í þessu verkefni sem fram undan er. Auk Evu eru þrjár aðrar í hópnum sem ekki hafa áður verið í A-landsliðinu. Þjálfari A-landsliðs kvenna er Benedikt Guðmundsson, fyrrverandi þjálfari karlaliðs Þórs.

Landsliðið mætir Svíum ytra í tveimur æfingaleikjum á morgun og laugardag. Leikirnir eru liður í undirbúningi liðsins fyrir þátttöku í undankeppni EM 2025 sem hefst í nóvember, en dregið verður í riðla í september.

Við óskum Evu til hamingju með valið og óskum henni góðs gengis með A-landsliðinu.

• KKÍ | Landslið kvenna: Tveir vináttulandsleikir gegn Svíðþjóð í Södertalje (kki.is)