Fótbolti: Þriðji sigur Þórs kom í Kórnum

Þórsarar unnu sinn þriðja sigur í A-deild karla í Lengjubikarnum í dag þegar þeir mættu HK í Kórnum. Þór og KR berjast um efsta sæti riðilsins.

Þórsarar náðu forystunni á lokamínútu fyrri hálfleiks með marki sem Ingimar Arnar Kristjánsson skoraði - eða samkvæmt lýsingum fékk hann boltann í sig og þaðan fór hann í markið. Það telur jafn mikið og önnur mörk. Eins marks forysta í leikhléi. Aron Ingi Magnússon bætti við öðru marki á 60. mínútu og þar við sat. Þórssigur í höfn og fram undan er toppslagur Þórs og KR í riðlinum. Bæði lið hafa unnið alla þrjá leiki sína til þessa. Þórsarar eiga eftir að mæta KR og Fjölni, en auk Þórsara eiga KR-ingar eftir að mæta Stjörnunni. Aðeins efsta lið riðilsins fer í undanúrslit Lengjubikarsins.

HK - Þór 0-2 (0-1)

• 0-1 Ingimar Arnar Kristjánsson (45')
• 0-2 Aron Ingi Magnússon (60')
• Leikskýrslan (ksi.is)
• Mótið (ksi.is)

Næst

• Mót: Lengjubikar, A-deild karla, riðill 3
• Leikur: Þór - KR
• Staður: Boginn
• Dagur: Laugardagur 2. mars
• Tími: 15:00