Þórsararnir öflugir í sigri U17

Egill #3, Ásbjörn #4, Einar #6, Sverrir #13.
Mynd: Hulda Margrét Óladóttir / KSÍ

Fjórir Þórsarar komu við sögu þegar U17 ára landslið Íslands í fótbolta vann öruggan sigur á Norður-Makedóníu í undankeppni EM.

Undankeppnin fer fram á Íslandi og er leikið á Þróttarvellinum í Laugardal.

Þórsararnir Ásbjörn Líndal Arnarsson, Einar Freyr Halldórsson og Sverrir Páll Ingason eru í landsliðshópi Íslands auk Þórsaranna Egils Orra Arnarssonar og Sigurðar Jökuls Ingvasonar en þeir tveir síðarnefndu eru í dag leikmenn danska stórliðsins Midtjylland.

Ásbjörn, Egill, Einar og Sverrir voru í byrjunarliði Íslands í kvöld þegar liðið vann öruggan 4-1 sigur á Norður-Makedóníu. Ásbjörn og Sverrir léku allan leikinn í vörn íslenska liðsins og Einar allan leikinn á miðjunni en Egill, sem bar fyrirliðaband Íslands, fór af velli á 84.mínútu.

Næsti leikur strákanna er gegn Eistum á laugardag en nánari upplýsingar um mótið má nálgast á vef KSÍ.

Okkar menn sáttir í leikslok