Árni Óðinsson gerður að heiðursfélaga

Árni Óðinsson, fyrrverandi formaður Þórs og nú heiðursfélagi, ásamt Nóa Björnssyni, formanni Þórs. Mynd: Ármann Kolbeinsson.

Árni Óðinsson var í gær sæmdur heiðursfélaganafnbót í Íþróttafélaginu Þór á samkomu í tilefni af 108 ára afmæli félagsins.

Nói Björnsson formaður flutti eftirfarandi ræðu um Árna við athöfnina:

Árni Óðinsson rafvirki og fyrrum íþróttamaður var og er einn af betri skíðamönnum sem Akureyringar hafa átt. Margfaldur Íslandsmeistari á skíðum í svigi og stórsvigi og ólympíufari.

Í nærri fjóra áratugi hefur Árni sinnt miklu og öflugu félagstarfi fyrir Þór. Fyrst kom hann inn í starf unglingaráðs knattspyrnudeildar m.a. sem formaður þess um árabil. Þá lá leið hans í stjórn knattspyrnudeildar sem formaður.

Eftir margra ára starf fyrir knattspyrnudeild lá leið hans inn í aðalstjórn. Fyrst sem varaformaður á árunum 2006-2010 og svo sem formaður félagsins 2012-2018.

Árni sat í framkvæmdarnefnd fyrir Þór frá árinu 2007 þegar uppbygging á félagssvæði Þórs var í undirbúningi og á framkvæmdatímanum.

Þeir sem starfað hafa með Árna í félagsmálum eru sammála um að hann hafi í hvívetna verið sanngjarn og afar réttsýnn og þægilegur í öllu viðmóti.

Árni var sæmdur gullmerki Þórs á 90 ára afmæli félagsins í júní 2005, en áður hafði hann hlotið silfurmerki félagsins. Einnig gull- og silfurmerki KSÍ. Þá hlaut Árni heiðursviðurkenningu Frístundaráðs Akureyrar árið 2018.

Íþróttafélagið Þór óskar Árna til hamingju með heiðursfélaganafnbótina og þakkar honum farsæl störf í þágu félagsins.

Myndaalbúm frá athöfninni - Ármann Kolbeinsson.