Egill Orri til reynslu hjá FC Midtjylland

Egill Orri Arnarsson.

Þórsarinn Egill Orri Arnarsson æfði með og skoðaði aðstæður hjá danska úrvalsdeildarliðinu Midtjylland í síðustu viku.

Danska félagið bauð Agli til sín fyrr í vetur og úr varð að Egill hélt til Danmerkur ásamt foreldrum sínum og dvaldi hjá danska félaginu í sex daga. Egill æfði með U16 og U17 ára liðum félagsins auk þess að taka þátt í æfingaleik gegn AGF Aarhus með U16 liði Midtjylland. Stóð Egill sig með mikilli prýði og lét sjálfur vel af dvöl sinni í Danaveldi.

Egill varð fimmtán ára gamall á dögunum en fyrr í vetur skrifaði hann undir sinn fyrsta leikmannasamning við Þór. Hann lék einnig sinn fyrsta leik fyrir meistaraflokk þegar hann kom inná í leik gegn Keflavík í Lengjubikarnum. Egill var hluti af Íslandsmeistaraliði Þórs í 4.flokki síðasta sumar.

Þetta er í annað skiptið í vetur sem Egill fer erlendis til reynslu en hann fór til ítalska úrvalsdeildarliðsins Torino undir lok síðasta árs. Egill Orri á þrjá landsleiki fyrir U15 ára landslið Íslands og var á dögunum valinn í æfingahóp hjá U16 ára landsliðinu.