Handbolti: Mikilvægur heimaleikur eftir tap í fyrsta leik

Eftir þriggja marka tap fyrir Herði á Ísafirði í fyrsta leik úrslitakeppni Grill 66 deildarinnar í handbolta á þriðjudagskvöldið er mikilvægur heimaleikur á dagskrá annað kvöld, föstudaginn 12. apríl kl. 19:30.

Hörður sigraði Þór í fyrsta leik liðanna í úrslitakeppni Grill 66 deildar karla í handbolta, en vinna þarf tvo leiki til að fara áfram í úrslitaeinvígi við Fjölni. Það kemur því ekkert annað til greina en sigur hjá Þórsurum í leiknum annað kvöld. Leikurinn hefst kl. 19:30 og mikilvægt að fá fjölmenni í Höllina til að styðja strákana í baráttunni um að komast upp í Olísdeildina.

Markvörður Ísfirðinga erfiður

Markvörður Ísfirðinga var Þórsurum erfiður í leiknum, varði 22 skot. Þórsarar skoruðu fyrsta markið, en heimamenn í Herði náðu fljótt forystunni og héldu henni út allan leikinn. Þórsarar náðu á köflum í leiknum að vinna muninn niður í tvö mörk, en komust ekki nær heimamönnum en það og niðurstaðan að lokum þriggja marka tap.  

Hörður - Þór 28-25 (14-10)

Ítarleg tölfræði leiksins (hbstatz.is)

Mörk: Brynjar Hólm Grétarsson 10, Arnór Þorri Þorsteinsson 7, Aron Hólm Kristjánsson 3, Sigurður Ringsted Sigurðsson 2, Arnþór Gylfi Finnsson 1, Halldór Kristinn Harðarson 1, Þormar Sigurðsson 1.
Varin skot: Tómas Ingi Gunnarsson: 11 (28,2%).
Refsimínútur: 4.